Iceland رحلتي الى ايسلندا

In Blog مدونه, Travel سفرby Nora Saad4 Comments

 

Iceland

حبيت اتكلم عن هالبلد لأن اكتشفت كثير مايعرفون عنها ولا شي

المعلومات الي بذكرها بتنصدمون انها موجوده اساسا فالكره الارضيه 

والأماكن خرافيه فيها جمال غير معتاد 

 

خريطه البلد  

للاسف مافي رحلات دايركت الي عرفته فيه عن طريق باريس ولندن 

انا اخذت عن طريق لندن تبعد ساعتين ونص  

iceland-location-map

معلومات غريبه عن ايسلاند 

جزيره تكثر فيها البراكين والبحيرات الجليديه والشلالات وسخانات المياه الارضيه لدرجه اغلب السكان عندهم سخانات حاره لهم في كل بيت ونظام تدفئه مجاني  

اما المياه من انقى المياه كنا نشرب من نفس الصنبور حق المغسله 

يعني هناك الي يشتري مويه ملعوب عليه 

الا اذا يبي ماركه مويه معينه هذا شي ثاني 

 

الأجواء

بارده جدا على مدار السنه حتى بالصيف  

والشي الي انبهرنا منه بفصل الصيف ماتغيب الشمس متخيلين ؟؟

طول اليوم نهار الا 3 ساعات باليوم تخف الشمس 

اما بالشتاء العكس تشرق الشمس 3 ساعات وباقي اليوم تظلم الدنيا  

عشان كذا افضل أوقات سياحه لهالبلد في الصيف 

 

الأماكن السياحيه 

  Reykjavik واحد من أشهر الفنادق في العاصمه مدينه​

Blue lagoon يتميز الفندق فالبحيره الحاره 

وهالبحيره مياها تعالج الأمراض الجلديه وفيها تربه بيضا يستخدمونها لتقشير الجسم مفيده جدا 

هنا صور للمدخل والبحيره الخاصه بالفندق 
DSC00715 

وهنا صور للغرفه وشكل الغرف من برى 

DSC007222

هذا الفندق انصح بقضاء ليله فيه لان مافيه اي شي غير هالبحيره 

الي مو حاب يسكن بالفندق فيه بحيره كبيره جنب الفندق لها رسوم دخول

بس مشكلتها زحمه الناس بس الفندق يميزه الخصوصيه وبحيره خاصه لك

Blue lagoon هنا صور للبحيره العامه 

 DSC00742Blue Lagoon وهذا المطعم الوحيد فمنطقه 

DSC00749 وهذي الاطباق الي طلبناها 

فالبدايه قدمولنا صحن فيه نوعين خبز مع زبده 

 المشروب 9/10 

 strawberry mojito without alcohol

 الشوربه بالاعشاب البحريه مع الشوكولاته البيضا دمج غريب بس لذيذ 10/10 

 Langoustine soup

10/10 الطبق الرئيسي كان الذ لحم اكله فحياتي 

Rack of lamb

DSC007522

اما باقي الايام رحنا وسط المدينه واخذنا سكن قريب من محطه الرحلات 

لأن المدينه صغنونه مافيها شي تقدرون تلفونها بساعتين مشي 

باخذكم بلفه عالمدينه 

 

Reykjavik مدينه

Hallgrimskirkja من أشهر المعالم الي فيها كنيسه 

DSC00943

 The sun voyager المكان الثاني 

معلم على شكل قارب يسمونه قارب الاحلام يرمز للحريه والأمل 

DSC00972

عندهم شارع واحد معروف فيه محلات ومطاعم وسوبرماركت 

DSC00984

المطعم الوحيد الي جربناه في المدينه لأن باقي الايام رحلات ونرجع متأخر 

vegamót bistro مطعم 

لذيذ البرجر  10/10

DSC00923

Tours الرحلات 

نبدا احلى فقره فالموضوع 

 بحثت كثير عشان اختار شركه كويسه للرحلات والحمدلله توفقنا مع هالشركه 

( FlyBus ) مواعيدهم تمام ويمرونك ويرجعونك للسكن

https://www.re.is/

اغلب الرحلات اوقاتها تبدا من 7 الصباح الى 9  اغلب الوقت يروح بالطريق

بعض الاماكن تبعد 3 الى 4 ساعات بس كل ساعتين نوقف كوفي ودوره مياه وانتم بكرامه 

DSC00963

Fridheimar farm

مزرعه الطماطم تبعد ساعه عن المدينه

اجواء البلد ماتساعد على الزراعه فلازم المكان يكون مغلق ويحطون اضاءات تعويض عن الشمس

فيها مطعم وفيها محل كله طماطم وصلصات طماطم ومربى طماطم بعد 

شريت صلصه ومربى ودي اقش منه واذوقكم فريش ولذيذ 

DSC008011

 

strokkur geyser

من أشهر النوافير او زي مايسمونها سخانات المياه 

ارتفاع حراره المياه في الارض يخليها تتدفق بهالشكل الي بتشوفونه بشكل مفاجئ والناس تتجمع تنتظر هاللحظه

DSC008088

Gullfoss waterfall شلال

أكبر شلال فالبلد قصته انشهرت من بنت كانت تحب هالشلال والحكومه قررت تخربه 

والبنت هددت انها بتنتحر وترمي نفسها فالمويه اذا فكرو يخربونه 

والحين هالمنظر الخرافي موجود لنا من هالبنت البطله تعجبني هالشخصيات المؤثره

DSC008622 هنا صوره البنت البطله ونبذه عنها 

DSC00881

Snæfellsnes

منطقه فيها جبال وأنهار ومنحدرات وفيها طرق للمشي على تربتهم الي تشكلت من بقايا البراكين 

DSC011244

South Shore

شاطئ اسود كله احجارسودا بدون رمل تكونت من بقايا البراكين 

DSC01203 DSC01189

Seljalandsfoss waterfall 

واحد من أجمل الشلالات الي يميزه أنه له مدخل جوى الشلال وفيه طريق يوصل للقمه 

DSC01228DSC01245

Jökulsárlón Glacial Lagoon

وصلنا لأجمل منظر بالنسبه لي فالبلد 

 سبحان الله قطع ثلج ضخمه تطفو فالبحيره مكونه هالمنظر الخرافي الي ماينمل منه

الرحله هذي بدت من 7 الصباح الى 10 بالليل 

مسافه الطريق 4 ساعات روحه و4 ساعات رجعه 

والله مدري كيف راح الوقت بالطريق يمكن المناظر الحلوه نستنا ونوقف كل شوي نرتاح

الخبر السيئ لما قالولنا انه بعد كم سنه بيختفي هالمنظر وبيذوب كل الثلج عشان الاحتباس الحراري

 🙁 كنت ناويه اجي انا وعيالي وأحفادي فالمستقبل أوريهم هالمكان 

DSC01268 DSC01326 DSC01317

وأختم الموضوع بمنظر ماحصل لنا نشوفه لأنه مايطلع الا بالشتا لما يكون كل اليوم ظلمه 

 هي اضاءه تنور فالسماء أسمها 

Northern Lights

عباره عن جسيمات مشحونه من الشمس تصادمت مع جزيئات غازيه من الغلاف الجوي

وتكونت منها هالاضواء الراقصه 
iceland-hotel-ranga_0

 

رأيي عن البلد

البلد عجيبه ماراح تشوف اي مكان يشبه لها 

وكلها مغامرات ومشي واستكشاف ابد ماتنفع للناس الي تحب تسافر وتقعد فنفس المكان دايم  ولاتنفع للكشخه هناك بيكون همك تتدفين وتلبسين هالجاكيتات ليــــن تتفخين 

في اماكن اكثر بكثير من الي ذكرتها ويمكن احلى بس اكتفيت بالي شفته وزرته 

البلد مو وجهه عرب وخليجين بس شفنا امريكين واسيويين 

انصح بأسبوع مو أكثر لأنها صغيره 

 

ان شاءالله دخلتكم جو وانبسطتو بالموضوع 

NS 🙂

Comments

  1. التقرير اكثر من رائع صدق ماكان ودي يخلص 🙁 

    الحين ايسلاند من ضمن الاماكن اللي لازم ازورها حمستيني لها?

  2. رررروعه حبيت تقريرك من جد ماكان ودي يخلص ..فعلا غريبه هالبلدد واول مره اشوف تقرير عنهاا وحبيتهر فعلا حسيتها مميززه مرره????

  3. خيال البلد ماكنت اعرف عنها اي معلومات قبل!!! ان شاءالله ازورها قريب وازور الاماكن الي نصحتي فيها 👍👏

Leave a Comment